Creation Science Information & Links!
Psalms 1, 51, 100 & 150
Psalms 1 • 51 • 100 • 150 - in Navajo; Diné bizaad
Psalm 1

Diné doo Diyin God k'ehgo ádaat'éii na'ak'íyádaałti'ii doo bik'ehgo joogáałii, bąąhági ádaaníiłii nidi doo bitah dzizíinii áádóó ándahałt'i'ii nidi doo bitah dzizdáii éí hoł hózhǫ́,   nidi Bóhólníihii yee has'áanii bąą hoł nihoozhǫǫh; t'áá ákwíí jį́ índa t'áá ákwíí tł'éé' yee has'áanii nabik'ítsídzíkees.   Índa tó danílíinii bibąąhgi tsin bąąh ant'áanii íí'áhígíí nahojílin; baa náhwiilzhíishgo honeest'ą' hąąh náhoodleeł; hat'ąą' éí doo niiłnéeh da. Áádóó t'áá ájoolíłígíí yá'át'éehgo há áánííł.   Doo Diyin God k'ehgo ádaat'éii éí doo ákódajít'ée da, nidi éí azhool bił yóó'adahayółígíí nidahojílin.   Éí bąą Diyin God doo bik'ehgo ádajít'éii ánihwiit'aah beiníłką́ądi doo atah dadzoozįįh ádajít'ée da, índa t'áá ákogi ádaadzaii áłah nilį́įgi bąąhági ádajooníiłii doo atah nidzizį́į da doo,   háálá t'áá ákogi ádaat'éii bá honít'i'jí Bóhólníihii bił bééhózingo yaa áhályą́, nidi doo Diyin God k'ehgo ádaat'éii bá honít'i'jí bił yóó'ahodoogááł.
 

Psalm 51

Diyin God nílíinii, aa a'ááh nínízinii bik' ehgo shaa jiiníbaah; bee aa a'ááh nínízinii t'óó ahayóígíí bik'ehgo bee haz'áanii héti'ii shá k'éé'íłchxǫǫh.   Doo ákwii áát'įįdii ałtso shąąh táánígis áádóó ádił ni'ayészíi'ii shąąh dííłdah!   Háálá bee haz'áanii héti'ii baa ákoniizį́į́', índa ádił ni'ayészíi'ii t'áá áłahjį' shi'diił'á.   Ni lą́ą, ni t'éiyá nich'į' ádił asésiih, índa doo yá'áshóonii ninááł baa niséyá, áko háínídzíi'go t'áá aaníí át'éé góne' bee nééhodoozįįł, índa baa nísínít'įįdgo t'áadoo bee nik'íhót'ahí da doo.   Jó, doo ákwii ánísht'éégóó shi'dizhchį́, áádóó bąąhági át'éii t'áá bił shimá shí'niiltsąąd.   Jó, t'áá aaníinii yee át'é laanaa nínízin, áádóó shijéí bii'di bee hódzáanii shił bééhózingo áshílééh.   Ch'il hísap wolyéhígíí bee, nááhániihii bidił shik'íníłtahgo ádił ni'ayészíi'ii shąąh ádingo áshílééh, áko índa baa'ihii shąąh ádin doo. Táásígisgo yas biláahgo łinishgaigo áshidíílííł.   Bee ił hózhóonii áádóó baa hózhóonii diists'a'go áshílééh, áko shits'in dahíníti'ii bił nídahodoojǫǫł.   Ádił ni'ayészíi'ii bits'ą́ąjį' ánínééh, áádóó doo ákwii áát'įįdii ałtso shá k'éé'íłchxǫǫh.   Diyin God nílíinii, baa'ihii shijéí bii' ádingo ánílééh, áádóó níłch'i shii' hólónígíí ba'ahódlíigo ániidí ánánídlééh.   Honílónígíí bits'ą́ąjį' áshólééh lágo, áádóó niNíłch'i Diyinii shits' ą́ąjį' kóole' yíila'.   Nibee yisdá'iildéehii baa hózhóonii shich'į' kónánídlééh, áádóó íinisingo áshiinilaaígíí bee de áshíínísin.   Áko bee haz'áanii nidayiitíihii nik'ehgo ádahoot'éii bínabinishtin doo, áádóó bąąhági ádaaníiłii nich'į' nináhákáah dooleeł.   Diyin God nílíinii, ni, Diyin God yisdáshííníłtíinii, dił deezna'go bee ádihodiisht'i'ii bits'ą́ąjį' yisdáshíłteeh, áádóó t'áá ákogi ááníłígíí yéego baa hashne'go hashtaał doo.   Bóhólníihii nílíinii, shizéé' ąą áhólééh, áko bee naa hashniih doo.   Háálá nááhániihii doo nínízin da, éí doodaii' nich'į' nááháshniih doo nít'éé'; didlidgo nich'į' nááhániihígíí doo baa nił hózhǫ́ǫ da.   Ádaa hojoolbá'ígo yínííł naagháii nááyiiłniihii éí Diyin God bił nilį́; Diyin God nílíinii, ádaa hojoolbá'ígo t'áá bijéí tł'ááhdę́ę́' ádił ni'iisíi'go yąąh bíni'go yínííł naagháii éí doo nahjį' kódíílíił da.   Yá'át'éehgo nił hózhǫ́ǫgo yá'át'éehii Záíyan bá baa naniná; Jerúsalem ditą́ągo binaa ahééda'astł'inígíí nánítł'in.   Áko índa t'áá ákogi át'éego náádahaniihii áádóó didlidgo náádahaniihii índa t'áá át'é didlidgo nááhániihii baa nił nihoozhǫǫh doo. Áko índa nibikáá' náá'iiniihí bikáa'gi dóola náádahidoonih.
 

Psalm 100

Nihokáá' dine'é nohłíinii, t'áá ánółtso Bóhólníihii bich'į' nídidohdla'go nihił nidahoozhǫǫh!   Nihił nidahoozhǫǫhgo Bóhólníihii bá nidaał'a'! Dahohtaałgo bidááhdę́ę́' ninohkááh!   Bóhólníihii éí Diyin God nilį́įgo béédahonohsįįh! Bí ánihiilaa, t'áá nihí doo ádeiidzaa da; bidine'é niidlį́ áádóó bikéyah hootsogóó bidibé naakaígíí nidahoniidlin.   Ahééh danohsingo yah ada'iiztiin góne' yah adahohkááh, áádóó baa dahohniihgo bikin bii' sohodizin bił haz'ą́ągi nidahohkááh! Bich'į' ahééh danohsin; bízhi' baa dahohniih!   Háálá Bóhólníihii éí yá'át'éehii nilį́; aa a'ááh nízingo ahóyéel'á, áádóó ba'ahódlíi náás oochííłgóó t'áá ałtso bił ahóyéel'á.
 

Psalm 150

Bóhólníihii baa dahohniih! Diyin God bikin bii' sohodizin góne' baa dahohniih; Bóhólníihii bibee adziilii bee yádiłhił biyi'di hasht'eyiilaii bee baa dahohniih le'!   Yaa naayáii ayóó ádaat'éii bee baa dahohniih; ts'ídá aláahgo ayóó át'éhígíí bik'ehgo baa dahohniih!   Deenásts'aa' bidee' bee í'dílzoołí diits'a'go baa dahohniih; tsin tł'óół neeznáá bąąh daneelzhee'go bee nida'a'néii índa tsin tł'óół naakits'áadah bąąh daneelzhee'go bee nida'a'néii bee baa dahohniih!   Da'ołzhishgo ásaa' yigádígíí áádóó tsin tł'óół bąąh daneelzhee'ígíí ał'ąą ádaat'éii índa tsin bee í'dílzoołí bee baa dahohniih!   Béésh ahídí'niłii diits'a'go, béésh ahídí'niłii ayóó íits'a'go bee baa dahohniih!   Bíni'dii nídídzihii nináneel'ą́ąjį' t'áá ałtso Bóhólníihii yaa dahaniih le'! Bóhólníihii baa dahohniih!
 


Psalms 1 • 51 • 100 • 150 · Diné bizaad
http://www.creationism.org/navajo/saPs1_51_100_nv.htm

Main:  Navaho
www.creationism.org